Josef Fritzl. AP

Elisabeth Fritzl, sem haldið var nauðugri í kjallara af föður sínum Josef Fritzl í 24 ár, hefur yfirgefið stofnunina þar sem hún hefur fengið aðstoð síðan henni og sex börnum hennar var bjargað í apríl sl.

Elisabeth og börnin eru flutt í sitt eigið hús en faðir hennar og barnanna bíður réttarhalda. Hann er ákærður fyrir að hafa rænt henni þegar hún var 18 ára gömul og haldið henni fanginni í sérútbúnu neðanjarðarskýli. Er hann einnig ákærður fyrir þrælahald, nauðgun og morð á yngsta barni hans og Elisabeth.

Josef Fritzl neitaði að kalla eftir læknishjálp þegar barnið fæddist, þrátt fyrir að vita að það gæti dáið. Fritzl, sem er 73 ára, hefur verið í varðhaldi síðan upp komst um málið í apríl. Það gerðist þegar elsta dóttir Elisabeth, Kerstin, var flutt á spítala með nýrnabilun. Þrjú barnanna ólust upp í kjallaranum hjá móður sinni en hin þrjú ólust upp hjá Fritzl og eiginkonu hans, móður Elisabeth.

Hann á yfir höfði sér ævilangt fangelsi.