Hosni Mubarak, forseti Egyptalands, lýsti því yfir í dag að Egyptar muni ekki opna landamæri Egyptalands og Gasasvæðisins fyrr en Mahmoud Abbas, leiðtogi Palestínumanna, og heimastjórn hans hafi tekið við völdum á Gasasvæðinu að nýju.  Þetta kemur fram á fréttavef Jyllands-Posten.

Hamas samtökin fara nú með völd á Gasasvæðinu og hafa Ísraelar gert harðar loftárásir á svæðið undanfarna fjóra sólarhringa.  Hefur það aukið þrýsting á Egypta um að opna landamærastöðina

„Við í Egyptalandi viljum ekki stuðla að klofningi á milli fylkinga Palestínumannanna með því að opna landamærastöðina í Rafah þegar heimastjórn þeirra og eftirlitsmenn Evrópusambandsins eru mótfallnir því að brotið verði gegn landamærasamkomulaginu frá árinu 2005,” sagði Mubarak í sjónvarpsávarpi í dag.

Yfirvöld í Ísraela hafa sakað Hamas samtökin um misnota Rafah landamærastöðina til vopnasmygls inn á Gasasvæðið.  Þá hefur lengi verið grunnt á því góða á milli stjórnar Hamas á Gasa og yfirvalda í Egyptalandi.  Hefur Mubarak m.a. ítrekað lýst því yfir að hann telji Abbas réttkjörinn leiðtoga Palestínumanna bæði á Vesturbakkanum og Gasasvæðinu.