Tian Wenhua, fyrrum forstjóri fyrirtækisins Sanlu AP

Kínverskir mjólkurframleiðendur, sem tengjast framleiðslu á menguðum mjólkurvörum á síðasta ári hafa sent nokkrar milljónir smáskilaboða í síma þar sem fólki er óskað gleðilegs árs og það beðið afsökunar á málinu. Þetta kemur fram á fréttavef BBC. 

„Við hörmum einlæglega þann skaða sem við höfum valdið börnunum og samfélaginu öllu,” segir í skilaboðunum sem send eru í nafni 22 mjólkurframleiðslufyrirtækja. „Við biðjumst innilega afsökunar og grátbiðjum ykkur um fyrirgefningu.” 

Þá segir að styrktarsjóður hafi verið stofnaður fyrir fjölskyldur þeirra barna sem verst hafa orðið úti en þúsundir barna þjást enn af afleiðingum mengunarinnar, aðallega nýrnabilunum og alvarlegum þvagfærasýkingum. 

Að minnsta kosti sex smábörn létu lífið í landinu á síðasta ári og 290.000 veiktust eftir að hafa neytt mjólkurdufts sem blandað var efninu melamín. Efnið er bannað í matvælaframleiðslu en því var blandað í mjólkurduftið til að það virtist innilafa meira prótín en það gerði í raun og veru. 

Tian Wenhua, fyrrum forstjóri fyrirtækisins Sanlu, hefur lýst sig seka um að selja falsaða vöru fyrir rétti og er talið að hún muni hljóta lífstíðar fangelsisdóm vegna málsins. Áður hafði verið talið líklegt að ún yrði dæmd til sauða vegna málsins en það virðist nú ólíklegt. Sautján voru ákærðir vegna melamín-mála í Kína í síðustu viku