Franskir sjóliðar fóru í morgun um borð í tvö meint sjóræningjaskip á Aden-flóa úti fyrir strönd Sómalíu og handtóku átta Sómala sem voru um borð. Sjóliðarnir réðust til atlögu við mennina eftir að þeir freistuðu þess að ræna flutningaskipi sem siglur undir fána  fána Panama. Þetta kemur fram á fréttavef BBC. 

„Andstaða var engin enda stóðu þeir frammi fyrir vel vopnuðu herskipi,” segir Christophe Prazuck, talsmaður franska heraflans.

Þá segir hann mennina hafa verið vopnaða skotvopnum og að þeir verði fluttir til Sómalíu þar sem þeir verði ákærðir. Þýskt herskip hefur áður handsamað sómalska sjóræningja á Aden-flóa en þeim var sleppt eftir að þeir höfðu verið afvopnaðir. 

Sjóræningjar náðu egypsku flutningaskipi og 28 manna áhöfn þess á sitt vald á Aden-flóa í morgun. Um 15 skip og 200 áhafnarmeðlimir eru nú á valdi sjóræningja úti fyrir ströndum Sómalíu en sjóræningjar rændu rúmlega hundrað skipum á svæðinu á síðasta ári.

Töluvert hefur þó dregið úr sjóránum þar eftir að nokkur ríki sendu skip úr flota sínum þangað.