Flugumferð er að færast í eðlilegt horf um Roissy-Charles de Gaulle flugvöllinn í París en þúsundir farþega þurftu að eyða nóttinni á flugvellinum vegna fannfergis. Air France þurfti að aflýsa 150 flugum af 400 um flugvöllinn í gær vegna snjókomu. 

Um þrjú þúsund farþegum var komið fyrir á hótelum í nágrenni flugvallarins í gærkvöldi en um tvö þúsund farþegar þurftu að eyða nóttinni í flugstöðvarbyggingunni. Samkvæmt upplýsingum frá flugvallaryfirvöldum fengu þeir matarpakka og teppi afhenta.

Hætt er að snjóa og búið að ryðja flugbrautir enn eru þó talsverðar tafir á flugsamgöngum vegna þess tíma sem fer í að afísa flugvélar sem eru að fara frá vellinum. Hins vegar var starfsemin á Orly flugvelli eðlileg en flugvöllurinn er sá annar stærsti í Parísarborg.

Miklar tafir hafa orðið á umferð í norður, mið og vesturhluta Frakklands í dag og í gær vegna snjókomu og hálku. Áfram er spáð kulda í Frakklandi eða 5-10 stiga frosti.