Mótmælendur mynda orðið Gaza í Amman, höfuðborga Jordaníu í gær. AP

Yfirvöld í Ísrael segja að 130 vopnaðir liðsmenn Hamas samtakanna hafi fallið í árásum og átökum við ísraelska hermenn frá því Ísraelsher hóf landhernað á Gasasvæðinu um helgina. Ísraelsher gerði rúmlega fjörutíu loftárásir á Gasaborg í nótt og hefur landher nú að mestu umkringt Gasaborg. Þetta kemur fram á fréttavef CNN.

Tuttugu og þrír Palestínumenn hafa látið lífið í árásum Ísraela á Gasasvæðinu það sem af er degi og hafa nú 555 Palestínumenn látið lífið frá því Ísraelar hófu að gera loftárásir á svæðið þann 27. desember. Að minnsta kosti hundrað konur og börn eru á meðal hinna látnu. Þá hafa 2.750 særst, flestir þeirra óbreyttir borgarar.

Gerð var loftárás á skóla í borginni í nótt þar sem um 400 manns höfðu leitað skjóls en Flóttamannastofnun Sameinuðu þjóðanna á svæðinu hafði gefið Ísraelum upp hnit skólans og fleiri staða þar sem fólki yrði boðið að leita skjóls undan árásum Ísraela. Þrír létu lífið í árásinni.