Manmohan Singh, forsætisráðherra Indlands, er hann ávarpaði ráðstefnu ráðherra öryggismála í ríkjum Indlands, í morgun. AP

Manmohan Singh, forsætisráðherra Indlands, hefur lýst því yfir að árásarmennirnir í hryðjuverkaárásunum í Mumbai í lok nóvember hljóti að hafa notið stuðnings opinberra stofnana í Pakistan. Þá segir hann Pakistana hafa magnað upp stríðsótta og taugaveiklun í kjölfar málsins. Þetta kemur fram á fréttavef BBC. 

„Sú nákvæmni og hernaðarlega tækni sem nýtt var við árásirnar sýna að skipuleggjendur þeirra hljóta að hafa notið stuðnings einhverra opinberra stofnana í Pakistan," sagði Singh er hann ávarpaði ráðstefnu ráðherra öryggismála í ríkjum Indlands, í morgun.

Þá gagnrýndi hann framgöngu pakistanskra yfirvalda í stríðinu gegn hryðjuverkum og sagði þau hafa veitt hryðjuverkamönnum og öðrum óvinum Indverja öruggt skjól.

„Því veikari sem staða ríkisstjórnarinnar er þeim mun óábyrgari verður framkoma hennar," sagði hann og bætti því við að rétt væri að einangra þau ríki á alþjóðavettvangi sem líti á hryðjuverkastarfsemi sem hluta utanríkismálastefnu sinnar.

Ummæli Singh þykja þau hörðustu sem indverskur ráðamaður hefur látið hafa eftir sér frá því tíu tilræðismenn urðu 170 manns að bana í árásunum í Mumbai.

Greint var frá því á Indlandi í gær að yfirvöld þar í landi hefðu afhent yfirvöldum í Pakistan gögn sem sanni aðild „ákveðinna afla” í Pakistan að árásunum.

Mikil spenna hefur verið í samskiptum ríkjanna frá því árásirnar voru gerðar.