Ísraelsher gerði árásir á a.m.k. sextíu skotmörk á Gasasvæðinu í nótt en samkvæmt upplýsingum hersins beindust allar árásirnar gegn liðsmönnum Hamas- og Jihad-samtakanna. Þetta kemur fram á fréttavef Ha’aretz.

Samkvæmt upplýsingum Palestínumanna voru rúmlega tuttugu loftárásir gerðar á Gasaborg í nótt. Einn lét lífið og tíu slösuðust í loftárásunum. Þá létu þrír liðsmenn Jihad samtakanna lífið og tveir slösuðust í loftárás Ísraela í morgun

 Að minnsta kosti 24 Palestínumenn létu lífið í hernaðaraðgerðum Ísraela á Gasasvæðinu í gær. Þeirra á meðal voru fjórir sem slösuðust er Ísraelar gerðu loftárás á skóla í Jabalya þar sem fólki hafði verið sagt að leita skjóls. 46 eru nú látnir eftir þá árás. Einnig lét fjögurra manna fjölskylda lífið er loftárás var gerð á bíl hennar í gær. Í nótt voru loftárásir m.a gerðar á heimili Yasser Natat, sem talinn er hafa skipulagt flugskeytaárásir Hamas frá Rafah á Gasasvæðinu yfir landamærin til Ísraels, og Mohammed Sanuar, leiðtoga samtakanna í Khan Yunis, samkvæmt upplýsingum Ísraelshers.

Fimm flugskeytum hefur verið skotið á Ísrael frá Gasasvæðinu í nótt og í morgun en í gær var 25 flugskeytum skotið yfir landamærin. Er það mikil fækkun frá því sem verið hefur undanfarnar þrjár vikur.

Ísraelar hafa fallist á að gera þriggja klukkustunda hlé á árásum sínum í dag til að gera hjálpastarf og vöruflutninga um svæðið mögulegt. Talsmenn hjálparstofnana segja þann tíma hins vegar of skamman.