Vladimir Putin og Mirek Topolanek takast í hendur í dag SERGEI KARPUKHIN

Rússar hafa skrifað undir samkomulag við Evrópusambandið sem gæti stuðlað að því að gaslínur til Evrópu verði opnaðar að nýju. Samningurinn, sem undirritaður var af Vladimir Putin forsætisráðherra Rússlands og Mirek Topolanek forsætisráðherra Tékklands, segir til um hvernig stjórna skuli gasstreymi til Evrópu í gegnum Úkraínu.

Hundruð þúsund evrópskra heimila hafa verið án upphitunar síðan gasflutningur í gegnum Úkraínu var stöðvaður á miðvikudaginn en á sama tíma hafa miklar frosthörkur geysað víða í Evrópu.

Topolanek, sem fundaði með Putin í 5 klukkustundir um málið í dag, ætlar nú að fara til Úkraínu, sem verður einnig að skrifa undir samkomulagið til að það taki gildi.  „Ég hef fulla trú á því að það sé ekkert í veginum fyrir því að Úkraínumenn undirriti samningin líka,“ hefur AP fréttaveitan eftir honum.

Samkvæmt samningnum munu eftirlitsmenn frá ESB, Úkraínu og Rússlandi hafa eftirlit með gasbirgðum, til að Rússar geti verið fullvissaðir um að Úkraínumenn steli ekki gasi fyrir eigin afnot, eins og þeir Rússar hafa sakað þá um. Búast má við því að fulltrúar ESB muni vera við dælustöðvarnar við landamæri Úkraínu á sunnudagskvöld.

En jafnvel þótt samkomulagið gangi í gildi geta þau rúmlega 15 lönd sem gasdeilan hefur bitnað illa á ekki búist við að geta hitað hús sín með gasi fyrr en í fyrsta lagi á mánudag. Evrópusambandið fær um fjórðung af gasbirgðum sínum frá Rússlandi og er um 80% þess flutt með leiðslum í gegnum Úkraínu.