Indónesísk ferja sökk í stormi í dag, í um tveggja metra háum öldugangi. Um borð voru 250 farþegar og 17 manna áhöfn. Nokkrir starfsmannanna og 18 af farþegunum hefur þegar verið bjargað, en óvíst er um örlög hinna, að sögn hafnarlögreglunnar.

Farþegaferjan var á leið milli eyjanna Sulawesi og Kalimanan, indónesíska hluta Borneó. Eftir að skipstjórinn tilkynnti að ferjan hefði lent í miðjum stormi rak hana um 50 kílómetra af leið. Farþegunum 18 var bjargað af sjómönnum sem fundu þá á þremur björgunarbátum.

Bátar og ferjur eru mikilvæg samgönguleið í eyjaklasanum Indónesíu, þar sem um 235 milljónir manna búa á yfir 17 þúsund eyjum. Léleg eftirfylgni með öryggisreglum og ofhlaðnir bátar valda því að hundruð manna láta lífið í sjóslysum á hverju ári.