EES-samstarfið gæti komist í uppnám fari svo að Ísland gengi í ESB. Reuters

Ef samstarfið um Evrópska efnahagssvæðið milli Evrópusambandsins (ESB) og Norðmanna kemst í uppnám eða verður sagt upp, vill stór hluti Norðmanna, sem annars er á móti ESB, vera með í ESB, að því er ný skoðanakönnun sýnir.

Noregur á ekki að sækja um aðild að Evrópusambandinu þó svo að búast megi við að Íslendingar geri það í náinni framtíð, að því er meirihluti norskra kjósenda telur. Hins vegar, ef samstarfið um Evrópska efnahagssvæðið (EES) fellur niður, telur meirihluti Norðmanna að rétt sé að sækja um aðild að ESB. Frá þessu er sagt í Dagbladet.no.

EES  er heitið á samstarfi um sameiginlegt efnahagslegt umhverfi milli ESB, Noregs, Íslands og Liechtenstein. EES felur í sér að ákvarðanir ESB um innri markað gilda einnig um löndin þrjú.

Aðild Íslands að ESB gæti haft afleiðingar fyrir EES-samstarfið. Ef EES-samningurinn yrði  ógildur vegna aðildar Íslands að ESB telur meirihluti Norðmanna Noreg ekki geta staðið einan utan ESB og bæri því að sækja um aðild. TNS Gallup gerði skoðanakönnunina fyrir norsku Evrópuhreyfinguna.

„Það kemur ekki á óvart að aðild Íslands að ESB breytir ekki afstöðu Norðmanna til ESB. Við reiknuðum ekki með íslenskum áhrifum. En skoðanakönnunin sýnir líka að meirihluti þjóðarinnar sér ESB-aðild sem valkost við EES. Ef afleiðingin verður að EES-samningurinn breytist eða verður ógildur breytist allt. Ef Ísland gengur í ESB er EES-samstarfið í hættu og aðstæður breytast í Noregi og stjórnmálamenn verða að taka tillit til þess,“ segir aðalritari Evrópuhreyfingarinnar, Grete Berget.

Nærri  60% Norðmanna eru nú á móti aðild að ESB. Sterkust er andstaðan meðal kvenna og fólks á aldrinum 15-29 ára. Á hinn bóginn vilja 47,2% allra Norðmanna ganga í ESB, 41% er á móti og 11,8% eru óviss um afstöðu sína fari svo að EES-samstarfið komist í uppnám.