Olmert segir að skotið hafi verið frá byggingu SÞ

Ehud Olmert, forsætisráðherra Ísraels, staðhæfði í samtali við Ban Ki-Moon, framkvæmdastjóra Sameinuðu þjóðanna í dag að skotið hafi verið á ísraelska hermenn frá höfuðstöðvum stofnunarinnar í Gasaborg áður en Ísraelsher gerði árás á bygginguna og lagði hana í rúst. Þetta kemur fram á fréttavef Ha’aretz.

Þrír eru sagðir hafa látist í árásinni auk þess sem mörg tonn af mat og hjálpargögnum eyðilögðust.

Fyrr í dag bað Ehud Barak, varnarmálaráðherra Ísraels, Ban Ki-moon afsökunar á árásinni og sagði hana mistök sem tekin væru mjög alvarlega. Ban hafði þá fordæmt árásina og krafist rannsóknar á henni.

Þúsundir Palestínumanna hafa flúið heimili sín í borginni undanfarinn sólarhring. Þá segja Palestínumenn rúmlega þúsund manns hafa látið lífið í þriggja vikna hernaðaraðgerðum Ísraela á Gasasvæðinu.

Tugir létu lífið er Ísraelsher gerði í síðustu viku loftárás á stúlknaskóla Sameinuðu þjóðanna í Jabalya, þar sem almennum borgurum hafði verið ráðlagt að leita skjóls. Eftir atvikið staðhæfði Ísraelsher að skotið hafi verið á ísraelska hermenn frá skólanum og að lík herskárra Palestínumanna hefðu fundist í honum að árásinni lokinni.

Nokkrum dögum síðar greindu fulltrúar Sameinuðu þjóðanna frá því að Ísraelar hefði viðurkennt að ekki hafi verið rétt að skotið hafi verið frá skólanum.