Flugvél Schrenkers lenti í feni nálægt íbúðarbyggð í Flórída.

Hinn 38 ára gamli Marcus Schrenker hefur verið  ákærður fyrir að hafa falsað neyðarsímtal úr lofti áður en  hann lét flugvél sína hrapa. Björgunarmenn frá Flórída fundu hann sl. þriðjudag þremur dögum eftir neyðarsímtalið. Í því sagði hann að framrúða vélar sinnar hefði sprungið og það blæddi úr honum. Frá þessu er sagt á vef BBC.

Embættismenn telja að hann hafi skotið sér úr flugvélinni í fallhlíf og leyft vélinni að hrapa í fen. Fjármálafyrirtæki Schrenkers eru í rannsókn og hann skuldar tryggingafyrirtæki 500.000 dollara.

Schrenker var eini maðurinn um borð í vélinni, sem var eins hreyfils. Vél hans tók á loft frá Anderson, Indiana, sl. sunnudag og var á leið til Flórída. 

Þegar yfirvöld fengu neyðarsímtalið, á leið Schrenkers yfir Alabama, voru björgunaraðgerðir settar í gang. Tvær herflugvélar fóru á loft og fundu vél hans á sjálfstýringu, með dyrnar opnar og engin ummerki um flugmanninn.

Flugvélin hrapaði loks í fen nærri Milton í Flórída, í nálægð við íbúðarbyggð. Rannsóknarmenn sögðu hins vegar að engin ummerki væru um að framrúðan hefði brotnað né heldur að ummerki væru um að blætt hefði úr manninum. Schrenker fannst síðar á tjaldsvæði í Flórída og fréttir herma að hann hefði skorið sig á púls. Rannsakendur telja að Schrenker hafi ætlað vélinni að hrapa í Mexíkóflóa en hún hafi orðið bensínlaus áður en hún náði þangað.

Yfirvöld í  Indiana hafa verið að skoða fjármálafyrirtæki  Schrenkers og er grunur um að  öryggisbrot hafi átt sér stað, að sögn Jim Gavin, talsmanns Indiana-fylkis. Leitað var á heimili Schrenkers 31. desember að tölvum, kvittunum, myndum og öðrum skjölum sem tengjast fyrirtækjum hans, að sögn Gavins.

Tveimur dögum áður en vélin hrapaði gaf alríkisdómari í Maryland út sektarboð á hendur fyrirtækja Schrenkers að upphæð 533.500 dollara, tryggingafyrirtæki nokkru í hag. Fyrr í þessari viku gáfu saksóknarar í skyn að  Schrenker hefði veitt fólki ráðgjöf þrátt fyrir að leyfi hans hefði runnið út 31. desember. Dómari gaf þá út handtökuskipun á hann vegna fjármálasvika.