Árásum Ísraela á Gaza var víða mótmælt í Evrópu í dag. Á morgun verður haldinn mótmælafundur í Háskólabíói þar sem árásunum verður mótmælt en talið er að yfir 1.200 Palestínumenn hafi fallið í árásunum, þar af rúmlega 400 börn.

Í París komu um 2.600 manns saman til að mótmæla og voru margir með palestínska fánann. Beitti lögregla táragasi á mótmælendur þegar þeir reyndu að komast inn í Garnier óperuna. Nokkrir voru handteknir.

Það var mótmælt víðar í Frakklandi, meðal annars í borginni Marseille þar sem Mustapha Mohammadi, leiðtogi friðarsamtakanna Frakkland Palestína, sagði að fjöldamorðin á Gaza væru framin fyrir framan myndavélarnar með þöglu samþykki Bandaríkjanna og ýmissa Evrópuþjóða. 

Í Lundúnum komu um 3.500 manns saman á Trafalgar torgi og var yfirskrift mótmælanna „Mótmæli gegn níðingsverkum Ísraela og stríðsglæpum". Hvöttu ræðumenn bresk stjórnvöld til þess að kalla sendiherra landsins heim frá Tel Aviv.

Í Tyrklandi beindust mótmælin gegn Banaríkjunum, helsta bandamanni Ísraela. Söfnuðust mótmælendur saman fyrir utan sendiráð Bandaríkjanna í Ankara.  

Í Bosníu kom einnig fjöldi fólks saman til að mótmæla árásum Ísraela og líktu mótmælendur aðgerðum Ísraela við það sem bosníska þjóðin þurfti að þola á tíunda áratugnum. 

Í Genf í Sviss komu hundruð mótmælenda saman fyrir utan höfuðstöðvar Sameinuðu þjóðanna í Evrópu. Tók fjöldi barna þátt í mótmælunum í Genf. Hins vegar mættu um 1.500 manns á fund í Bern til þess að lýsa yfir stuðningi við árásir Ísraela.

Í Aþenu, höfuðborg Grikklands mættu um 1.000 manns og tóku þátt í mótmælum fyrir utan sendiráð Ísraela.