Erlent | mbl | 20.1.2009 | 8:27

Milljarðar í enduruppbyggingu

Palestínskur drengur að leik í rústum á Gaza Reuters

Enduruppbygging á Gaza-svæðinu, eftir þriggja vikna linnulausar árásir Ísraela, mun kosta milljarða Bandaríkjadollara, að mati Sameinuðu þjóðanna. Tugþúsundir Palestínumanna hafa misst heimili sín og um 400.000 hafa ekki rennandi vatn. Ban Ki-moon er sagður væntanlegur til Gaza í dag til að skoða eyðilegginguna að því fram kemur á vef BBC.

Vopnahlé Ísraela og Hamas-liða stendur enn og hefur fjöldi Palestínumanna snúið til síns heima til að skoða skemmdirnar.

Forsætisráðherra Ísraels, Ehud Olmert, hefur sagt að herlið Ísraela skuli yfirgefa Gaza eins fljótt og auðið er og hefur þegar nokkur hluti þess yfirgefið svæðið. Að sögn ísraelska hersins er ekki til umræðu að herinn dragi sig alveg út af svæðinu. Úr varnarmálaráðuneytinu bárust þau skilaboð að farið yrði eftir aðstæðum hverju sinni. „Við erum að fækka herliðum á Gaza-svæðinu, en sveitir okkar verða í viðbragðsstöðu svo hægt verði að bregðast við hverju því sem upp kann að koma,“ sagði háttsettur embættismaður í varnarmálaráðuneytinu við AFP-fréttastofuna í morgun.