Benedikt páfi XVI Reuters

Benedikt páfi XVI. nam í dag úr gildi bannfæringu fjögurra biskupa sem hefðarsinninn Marcel Lefèbvre erkibiskup vígði árið 1988. Þetta er skref í þá átt að koma á sáttum við kaþólsku heimskirkjunna, segir í fréttatilkynningu frá Pétri Bürcher Reykjavíkurbiskupi.

„Lefèbvre vígði biskupana fjóra í óleyfi og var því sjálfkrafa útilokaður frá hinu kirkjulega samfélagi. Árin þar áður höfðu einkennst af ásökunum og ósætti milli Rómar og trúboðsbiskupsins, sem ekki vildi samþykkja ýmis atriði úr ályktunum síðara Vatíkanþingsins, svo sem endurbætur á helgisiðunum eða yfirlýsingu um trúfrelsið og leit svo á það væri brot á hefðunum,“ segir Reykavíkurbiskup.

Lefèbvre biskup kallaði sjálfkrafa yfir sig bannfæringu þegar hann vígði í óleyfi biskupana Bernard Fellay, Alfonso de Gallareta, Tissier de Mallerais og Richard Williamson og gilti sú bannfæring einnig um biskupana fjóra.

„Frá embættistöku sinni hefur Benedikt XVI., líkt og forveri hans, Jóhannes Páll II., reynt að sigrast á klofningu kirkjunnar í kjölfar aðgerða Lefèbvre. Sífellt fjölgaði vísbendingum um að niðurstaða í málinu fengist því páfi reyndi mjög að koma á sáttum við Prestasamfélag Píusar X. og stuðningsmenn þess, en Lefèbvre stofnaði þetta félag.

Ekki hafa enn borist upplýsingar um afstöðu yfirstjórnar Prestasamfélags Píusar X., sem hefur aðalstöðvar sínar í Menzingen ZG í Sviss.

Víðtæk höfnun Prestasamfélagsins á endurbótum síðara Vatíkanþingsins er eftir sem áður mikil hindrun í vegi þess að full eining náist við kaþólsku kirkjuna,“ segir Pétur Bürcher Reykavíkurbiskup.