Lögregla í Þýskalandi segir, að svo virðist sem þýskur karlmaður hafi myrt eiginkonu sína og tvö börn í gærkvöldi. Beitti maðurinn, sem er 47 ára gamall, öxi og hníf.

Lögregla í borginni Saarlouis, skammt frá landamærum Frakklands og Þýskalands, segist hafa komið á heimili mannsins í gærkvöldi. Var maðurinn þá afar ölvaður og sat við hliðina á líki konu sinnar. Lík tvítugrar stjúpdóttur mannsins og 6 ára sonar fundust á efri hæð hússins.

Að sögn lögreglunnar hafði konan, sem var fertug, verið myrt með öxi en börnunum var ráðinn bani með hníf.

Þriggja ára sonur mannsins var einnig í húsinu þegar lögreglan kom þangað. Hann var ómeiddur en var fluttur á nálægt sjúkrahús.