Tvítugur karlmaður, sem handtekinn var eftir að hafa gengið berserksgang á dagheimili skammt frá Brussel í Belgíu á föstudag, er í hungurverkfalli í fangelsi og hefur neitað að ræða við lögreglu. 

Belgískir fjölmiðlar hafa eftir heimildum úr lögreglunni, að maðurinn, sem heitir Kim De Gelder, sé á sjúkradeild fangelsis í Bruges og fái þar næringu í æð. De Gelder var um helgina ákærður fyrir að myrða tvö ung börn og starfsmann dagheimilisins. 

Maðurinn réðist til inngöngu í dagheimilið, sem er fyrir börn upp að 3 ára aldri. Hann var málaður í framan og með rauða hárkollu. Hann sveiflaði hníf með 30 sentimetra löngu blaðið og skar börn, sem lágu í rúmum sínum.  Tíu börn og tveir starfsmenn særðust.

Lögregla hefur engar skýringar á hvers vegna De Gelder réðist á dagheimilið í   Dendermonde en hann býr sjálfur í öðrum bæ. Hann er ekki á sakaskrá, var allsgáður og á ekki að baki sögu um geðraskanir. Belgískir fjölmiðlar hafa þó eftir vinum hans, að hann hafi á stundum hagað sér einkennilega.