Gordon Brown. Reuters

Mjög hefur dregið úr fylgi breska Verkamannaflokksins á ný ef marka má skoðanakönnun, sem breska blaðið Independent birtir í dag. Samkvæmt henni mælist fylgi flokksins 28% og hefur minnkað um 6 prósentur frá því í desember. Fylgi Íhaldsflokksins hefur aukist um 4 prósentur og er 43% og fylgi Frjálslyndra demókrata mælist 16%.

Eftir mikið fylgishrun á fyrri hluta síðasta árs fór sól Verkamannaflokksins að rísa á haustmánuðum þegar Gordon Brown, forsætisráðherra og leiðtogi flokksins, tók frumkvæðið í efnahagsaðgerðum Evrópusambandsríkja. En nú eru Bretar fullir efasemda um stefnu flokksins í efnahagsmálum.

Í könnuninni segjast aðeins 33% telja að breska ríkisstjórnin hafi brugðist rétt við niðursveiflunni en 58% segjast telja að aðgerðirnar hafi verið rangar.

Vangaveltur hafa verið um að Brown muni boða til kosninga á næstunni en niðurstöður könnunarinnar eru taldar draga úr líkum á því. Kjósa verður fyrir 10. maí 2010.