Rússnesk Iskander-eldflaug

Rússneska Interfax-fréttastofan greinir frá því að stjórnvöld í Moskvu muni falla frá hótunum sínum um að koma upp kjarnorkueldflaugum nálægt pólsku landamærunum. Hefur fréttastofan þetta eftir nafnlausum heimildarmönnum í aðalherstjórn landsins, að sögn AP-fréttastofunnar, sem segir að varnarmálaráðuneytið hafi ekki viljað tjá sig um málið þegar eftir því var leitað í morgun.

Dmitry Medvedev sagði á síðasta ári að Rússar mundu koma sér upp Iskander-eldflaugum í Kaliningrad við Eystrasalt héldi Bandaríkjastjórn því til streitu að koma upp eldflaugavarnarkerfi í Póllandi. Sögðu Rússar að eldflaugakerfi af þessu tagi græfi undan vörum Rússa.

Interfax vitnaði í yfirmann í hernum sem sagði Iskander-áætlunin yrði nú söltuð þar sem hin nýja ríkisstjórn Bandaríkjanna myndi falla frá fyrri áformum.

Fjallað er um málið á vef breska blaðsins The Guardian sem túlkar ákvörðun Rússa sem merki um að þeir vilji bæta samskiptin við hin nýju stjórnvöld í Washington.

Barack Obama Bandaríkjaforseti hefur ákveðið að hin umdeilu áform varnarmálaráðuneytisins í Pentagon um eldflaugavarnir í Mið-Evrópu skuli tekin til endurskoðunar.

Ráðamönnum í Kreml hafi verið stórlega misboðið með áformum Bush-stjórnarinnar um að koma upp eldflaugavörnum og ratsjám í Póllandi og Tékklandi.

Rússar hafa talið á þessi áform raska kjarnorkuvopnajafnvæginu í Evrópu og þau beinist að Rússlandi meðan Bush-stjórnin hélt því jafnan fram að áætlunin væri ætluð til varnar gegn ógn frá Íran.

Obama hefur ekki gert upp hug sinn hvort áætluninni verður fram haldið eða hún lögð til hliðar, en hann er sagður hafa efasemdir um gildi hennar.

The Guardian segir að líta megi á yfirlýsingar sem vináttuvott gagnvart nýjum stjórnvöldum í Bandaríkjunum en um leið sem herbragð til að fá þau til að falla frá áförmum um að koma upp „eldflaugnavarnarskildi“ eins og þetta hefur verið kallað, í Mið-Evrópu.