George Mitchell. AP

Nýr sendifulltrúi Bandaríkjanna í Mið-Austurlöndum er kominn til Ísraels í opinbera heimsókn. Átök hófust á Gaza á nýjan leik í gær þegar Ísraelsher barðist við palestínska uppreisnarmenn.

George Mitchell mun eiga fundi með Ehud Olmert, forsætisráðherra Ísraels, og Mahmoud Abbas, leiðtoga Palestínumanna. Hann mun hins vegar ekki ræða við Hamas-samtökin, sem ráða lögum og lofum á Gaza.

Talsmaður sendifulltrúans segir að Mitchell muni hlýða á leiðtogana og skoðanir þeirra varðandi lausn á deilunni.

Þetta er fyrsta opinbera heimsókn sendifulltrúans til Ísraels. Á sama tíma hafa átök brotist út á Gaza á ný, þrátt fyrir að báðar fylkingar hafi lýst yfir vopnahléi.

Ísraelsher gerði loftárásir á Gaza við landamæri Egyptalands í nótt. Að sögn yfirvalda í Ísrael er verið að svara því þegar ísraelskur hermaður lét lífið í sprengjuárás við eftirlitsstöð í gær. Þrír særðust að auki.

Íbúar í bænum Rafah flýðu þegar eldflaugar hæfðu undirgöng sem Ísraelar segja að uppreisnarmenn noti til þess að smygla vopnum.