Norsk stjórnvöld ætla að ná upp kafbáti þriðja ríkisins sem hlaðinn var kvikasilfri og var sökkt við Noregsstrendur 1945. Mikil umhverfisógn þykir nú stafa af farmi kafbátsins. Stefnt er að björgun flaksins árið 2010.

„Sú staðreynd að það eru 67 tonn af kvikasilfri í bátsflakinu veldur mikilli ógn við umhverfið,“ sagði Helga Pedersen, sjávarútvegsráðherra Noregs, í viðtali við AFP. „Við tókum þessa ákvörðun með tilliti til umhverfisins, fiskimanna og íbúanna.“

Þýski kafbáturinn U-864 varð fyrir tundurskeyti í Norðursjó 9. febrúar 1945. Tundurskeytinu skaut breski kafbáturinn HMS Venture. Þýski kafbáturinn var á leið til Japans, bandamanna Þjóðverja, og átti að nota kvikasilfrið til hergagnagerðar. Um borð voru einnig teikningar að nýrri þýskri orrustuþotu, Messerscmitt Me 262. Allir í áhöfn kafbátsins, 73 sjóliðar, fórust.

Kafbátsflakið liggur nú í tveimur hlutum á 150 metra dýpi um 3,7 km frá eynni Fedje úti fyrir vesturströnd Noregs. Flakið fannst 2003 og hafa mörg kíló af kvikasilfri seitlað úr því á hverju ári. Þessi mengun hefur valdið íbúum í nágrenninu áhyggjum á áhrifunum á heilsu þeirra.

Hollenska fyrirtækið Mammoet hefur tekið að sér að lyfta flakinu af hafsbotni. Það bjargaði rússneska kafbátnum Kursk úr Barentshafi árið 2000. Björgunaraðgerðin er talin tæknilega flókin. Reiknað er með að hún verði gerð árið 2010. Áætlað er að björgunin kosti allt að milljarð norskra króna (tæpa 17 milljarða ÍKR), að sögn norskra fjölmiðla.

Norsk yfirvöld höfðu áður mælt með því að flakið yrði látið liggja á sínum stað en hulið kápu úr steinsteypu.