Ástralskur karlmaður hefur verið ákærður fyrir manndráp en hann er grunaður um að hafa varpað 4 ára gamalli dóttur sinni af brú niður í á, 58 metra fall. Stúlkan lifði fallið af en lést nokkru síðar á sjúkrahúsi.

Sjónarvottar segja, að maðurinn, sem er 36 ára, hafi stöðvað bíl sinn á West Gate brúnni í Melbourne í Ástralíu í gær og kastað barninu fram af brúnni í Yarraá. 

Nærstöddum tókst að bjarga stúlkunni úr áni. Lögreglumenn voru í 45 mínútur að reyna að lífga hana við. Barnið var síðan flutt á sjúkrahús með þyrlu en lést þar.

Tveir synir mannsins voru í bílnum þegar þetta gerðist. Mikil umferð var um brúna en þetta gerðist að morgni til. 

Að sögn lögreglu átti maðurinn í forræðisdeilu við fyrrum eiginkonu sína um forræði yfir börnum þeirra þremur. Réttarhald í málinu hófst á mánudag og hélt áfram á þriðjudag. Sátt náðist hins vegar þá um að foreldrarnir hefðu sameiginlegt forræði yfir litlu stúlkunni. 

Maðurinn var handtekinn fyrir utan dómhúsið í gær og þá voru synir hans með honum.