Mikil snjókoma hefur hamlað samgöngum í hluta Bretlands í dag en ekki hefur snjóað jafn mikið í Suðausturhluta Englands í átján ár. Í Lundúnum liggja samgöngur að miklu leyti niðri og hefur þurft að loka hluta Heathrow flugvallar. Tafir urðu á flugi Icelandair til Lundúna í morgun og vél sem lenda átti í Keflavík klukkan 16 frá Lundúnum mun væntanlega lenda klukkan 22 í kvöld.

Gordon Brown, forsætisráðherra, sagði á blaðamannafundi í Downing stræti í dag að bresk stjórnvöld geri það sem í þeirra valdi stendur til þess að tryggja það að hægt verði að koma almenningssamgöngum í eðlilegt horf sem fyrst. 

Veðurfræðingur BBC, Tomasz Schafernaker, segir að ástandið sé verst í Lundúnum og nágrenni. Allt að 30 sm jafnfallinn snjór er í borginni og útlit er fyrir að það snjói áfram fram í kvöld.

Þúsundir skólabarna í Englandi og Wales glöddust yfir því í morgun að þurfa ekki að mæta í skólann heldur gátu þau farið út að leika sér í snjónum. Á einhverjum stöðum þurfti að dusta rykið af snjóruðningstækjum sem staðið höfðu óhreyfð í fimmtán ár. 

Á sjúkrahúsum í Lundúnum hefur verið hætt við allar minniháttar aðgerðir og í raun einungis veitt bráðaþjónusta á sumum sjúkrahúsum þar sem starfsfólk hefur ekki komist til vinnu.

Vegna veðursins var ekkert dæmt í Old Bailey í dag og í einhverjum héraðsdómum var ákveðið að hafa lokað í dag. 

Í norðurhluta Wales létust tveir fjallaklifrarar á fjallinu Snowdon en þar hefur snjóað mikið undanfarna daga. Lýst var eftir mönnunum í gær og fundu björgunarsveitir lík þeirra í morgun.

Flugi um Heathrow flugvöll var aflýst til klukkan 17 og eru þeir farþegar sem áttu flug fyrr í dag beðnir um að koma ekki á flugvöllinn.