Forseti Frakklands, Nicolas Sarkozy, ætlar að ávarpa frönsku þjóðina í kvöld. Verður ávarpinu sjónvarpað á besta tíma en mikil reiði ríkir í frönsku þjóðfélagi með efnahagsástandið. Fyrir viku síðan tóku milljónir launþega þátt í verkföllum víðsvegar um Frakkland og var nánast allt athafnalíf landsins lamað í einn dag. Er áætlað að lengd ávarpsins sé 90 mínútur.

Yfir tvær milljónir Frakka voru án atvinnu í október og þeim fjölgar stöðugt. Sarkozy hefur reitt sig á björgunarpakka upp á 26 milljarða evra til þess að snúa efnahagsástandinu í betri farveg. Hann er hins vegar harðlega gagnrýndir fyrir að beina allri athyglinni að viðskiptalífinu á meðan ekkert sé gert fyrir heimilin í landinu.

Vinsældir Sarkozy hrapa á sama tíma og mælist hann nú með stuðning 39% frönsku þjóðarinnar og hefur hann aldrei verið jafn óvinsæll síðan hann tók við embætti.Launþegasamtökin hóta áframhaldandi verkfallsaðgerðum ef Sarkozy breytir ekki um stefnu í aðgerðum vegna efnahagskreppunnar. Vonast Sarkozy til þess að með ávarpinu takist honum að róa almenning niður en ýmsir óttast að stutt sé í að upp úr sjóði. Telja stjórnmálaskýrendur að Sarkozy muni ekki boða nein úrræði í ávarpi sínu í kvöld heldur reyna að verja þær aðgerðir sem þegar hefur verið boðað til.

Ávarpi forsetans verður sjónvarpað klukkan 19:15 að íslenskum tíma og verður það sýnt á þremur frönskum sjónvarpsstöðvum auk útvarps.