Fréttir hafa borist af því að sómalískir sjóræningjar hafi fengið greitt lausnarfé í skiptum fyrir úkraínskt flutningaskip, sem þeir hafa haft í haldi. Þeir muni brátt sleppa skipinu sem er hlaðið vopnum.

Sjóræningjarnir rændu skipinu MV Faina, sem sigldi áleiðis til Kenía, og áhöfninni í september í fyrra. Ránið vakti heimsathygli, enda hafa skapast talsverðar deilur varðandi skipsfarminn.

Stjórnvöld í Kenía segja að skriðdrekarnir og önnur vopn séu þeirra eign. Skv. farmskránni áttu vopnin hins vegar að fara til Suður-Súdans.

Sjóræningjarnir náðu skipinu á sitt vald 24. september sl. er skipið sigldi til Mombasa í Kenía. Tuttugu manns eru í áhöfn skipsins. Síðan þá hefur það legið við akkeri skammt frá bænum Harardhere ásamt öðrum skipum sem sjóræningjarnir hafa rænt.

Þeir fóru fram á það að þeim yrði greiddar 20 milljónir dala fyrir skipið. Fréttir herma hins vegar að þeir hafi sætt sig við 3,2 milljónir dala.

Að sögn bandaríska sjóhersins virðist sem svo að lausnarfénu hafi verið komið til skila í dag. Talsmaður eiganda skipsins segir að sjóræningjarnir séu nú að telja féð.