Stuðningsmenn föður Eluana Englaro mótmæla fyrir utan þinghúsið í Róm. Reuters

Eluana Englaro, 38 ára ítölsk kona sem hefur verið í dái í 17 ár, lést í dag skömmu áður en efri deild ítalska þingsins átti að greiða atkvæði um neyðarlög til að koma í veg fyrir líknardauða hennar.

Heilbrigðisráðherra Ítalíu, Maurizio Saccani, tilkynnti á þinginu að konan væri látin þegar þingmenn höfðu hafið umræðu um neyðarlögin.

Stjórn Ítalíu hafði áður samþykkt neyðartilskipun til að reyna að koma í veg fyrir líknardauða konunnar. Forseti landsins, Giorgio Napolitano, neitaði hins vegar að staðfesta tilskipunina og taldi hana stangast á við stjórnarskrána.

Silvio Berlusconi forsætisráðherra ákvað þá að kalla þingið saman til að samþykkja lög sem kæmu í veg fyrir að læknar og fjölskylda konunnar gætu hjálpað henni að deyja.

Eluana Englaro hafði verið í dái frá því í janúar 1992 þegar hún lenti í bílslysi. Mál hennar vakti mikla umræðu á Ítalíu um líknardauða og Berlusconi forsætisráðherra var sakaður um að notfæra sér málið í pólitískum tilgangi.

Dómstóll hafði samþykkt beiðni föður konunnar um að læknar mættu hætta að gefa henni næringu í æð og hjálpa henni þannig að deyja. Hann fékk þó enga lækna til að framfylgja dómsúrskurðinum þar til sjúkrahús í bænum Udine á Norður-Ítalíu samþykkti það.

Eluana Englaro hafði verið í dái í 17 ár. Reuter