Ahmadinejad segist tilbúinn til viðræðna í nýju andrúmslofti. Reuters

Forseti Írans, Mahmoud Ahmadinejad, sagðist í dag tilbúinn til viðræðna við Bandaríkin, svo fremi sem þær byggðust á „gagnkvæmri virðingu. "  Forsetinn ávarpaði þjóð sína í sjónvarpi í tilefni af því að 30 ár voru liðin frá íslömsku byltingunni.

„Írska þjóðin mun fagna sönnum breytingum og er tilbúin til viðræðna sem byggjast á jafnræði og gagnkvæmri virðingu," sagði Ahmadinejad í ræðu sinni .

Í gær kallaði Barack Obama Bandaríkjaforseti eftir viðræðum við Íran og sagði að hann teldi möguleika á að koma á sambandi milli þjóðanna tveggja sem byggði á gagnkvæmri virðingu og framförum. „Núna er rétti tíminn fyrir Íran að senda frá sér skilaboð um að það vilji breyta öðruvísi en hingað til."

Obama sagði að stjórnvöld í Bandaríkjunum væru að leita að nýrri nálgun í málinu þrátt fyrir áhyggjur af kjarnorkuvæðingu Írans, stuðningi þess við Hamas og Hezbollah samtökin og ögrandi ummælum sem beindust gegn Ísrael.

Ahmadinejad sagði í ræðu sinni að heimurin vildi ekki að hið myrka tímabil endurtæki sig og vísaði þar greinilega til stjórnunartíðar George W. Bush. Ef einhverjir hefðu áhuga á að endurtaka þann tíma þá myndu þeir mæta miklu verri örlögum en Bush gerði.

Frægt varð þegar Bush sagði að Íran væri hluti af „öxulveldi hins illa" ásamt Írak og Norður Kóreu. Á sama tíma vísuðu íranskir leiðtogar iðulega til Bandaríkjanna sem „Stóra Satans".