Frá blaðamannafundi Babacans í Riga í morgun. Reuters

Utanríkisráðherra Tyrklands, Ali Babacan, segir að landið verði tilbúið til að ganga í Evrópusambandið árið 2013. „Hins vegar vitum við ekki hvort ESB verður tilbúið fyrir okkur," sagði ráðherrann við blaðamenn í Riga í dag.

Babacan er í opinberri heimsókn í Lettlandi sem sjálft gekk í ESB árið 2004. Hann sagði að sambandið yrði að ná tökum á vanda á fjármálasviðinu sem og innansambandsmálum áður en það gæti opnað dyr sínar fyrir Tyrklandi.

„Okkur liggur ekkert á," bætti hann við og að Tyrkland myndi breytast mikið á næstu þremur, fjórum árum.

Tyrkland hefur gert áætlun sem miðar að úrbætum á efnahagssviðinu sem og í öðrum málum sem lögð er áhersla á að nái fram áður en landið fengi aðild að ESB. Stefna Tyrkjar að því að þessum úrbótum verði lokið árið 2013 en ráðamenn í Brussel hafa ekki tekið undir að miða ætti við það ártal.

Viðræður Tyrkja við ESB hófust árið 2005 en hægt hefur miðað í átt að aðild. Hingað til hefur verið rætt um minna en helming þeirra 35 stefnumála sem nauðsynlegt er að komast að samkomulagi um, s.s. viðskiptadeilu Tyrkja við Kýpur auk þess sem sum aðildarlönd ESB mælast eindregið gegn aðild Tyrklands að sambandinu.