Kaupmannahafnarlögreglan hefur handtekið 16 ára gamlan pilt, sem  grunaður er um að hafa skotið tvítugan karlmann í höfuðið í morgun. Það var þriðja skotárásin, sem komið hefur til kasta lögreglu í borginni á síðustu tveimur sólarhringum.

Skotárásin í morgun var gerð inni í íbúð við Aldersrogötu á Norðurbrú. Maðurinn, sem varð fyrir skotinu, var fluttur á sjúkrahús og lést þar af sárum sínum. Sjónarvottar sáu mann forða sér á hlaupum og síðdegis var 16 ára piltur, sem dvalið hefur í íbúðinni, handtekinn. Þá er 17 ára pilts einnig leitað. 

Sá sem lést er pakistanskur ríkisborgari. Að sögn lögreglu er ekki talið að morðið á honum tengist skipulagðri glæpastarfsemi í borginni en átök hafa verið milli innflytjenda og glæpaflokka, sem tengjast mótorhjólagengjum.