Argentína vísar umdeildum biskupi úr landi
Richard Williamson, biskup. Reuters
Argentínsk stjórnvöld hafa gefið kaþólska biskupnum, Richard Willamson, tíu daga frest til að yfirgefa landið en að öðrum kosti verði honum vísað úr landi. Biskupinn hefur valdið miklu uppnámi innan kirkjunnar eftir að páfi aflétti af honum og þremur öðrum ofuríhaldssömum biskupum bannfæringu um svipað leyti og Williamson afneitaði helför guðinga í sjónvarpsviðtali.
Í rökstuðningi fyrir ákvörðuninni tiltekur innanríkisráðuneytið bæði afneitun Williamson á helförinni og eins að hann hafi verið í landinu undir fölsku flaggi, þ.e. skráð sig sem starfsmann frjálsra félagasamtaka en ekki sem kirkjunarmann. Williamson hefur verið í Argentínu undanfarið og stýrt þar prestaskóla, að því fram kemur í The Guardian í dag.
Samtök gyðinga hafa fagnað ákvörðuninni. Talsmaður samtakanna Amia hefur sagt að skoðanir Williamson „raski borgaralegu jafnvægi og félagslegri sátt sem landið þarf svo mjög á að halda.“
Williamson, sem er fæddur í Bretlandi, hefur verið í miðju harðrar deilu innan kaþólsku kirkjunnar eftir að Benedikt páfi aflétti bannfæringu af honum og fleiri félögum í ofuríhaldssömum klofningsarmi sem kallast Samtök Sánkti Píusar X (SSPX) til að friðmælast við þá.
Sú ákvörðun hefur komið Benedikt páfa og páfagarði öllum í hin mestu vandræði, ekki síst í Þýskalandi og hjá ýmsum samtökum gyðinga, en ummælin sem Williamson lét nýverið falla í Svíþjóð fólu í sér að ekki hefðu verið til neinir gasklefar nasista og og fjöldi gyðinga sem drepnir voru í síðari heimsstyrjöldinni væru 300 þúsund fremur en 6 milljónir.
Mótmælin skóku Vatíkanið og settu heimsókn páfa til Ísrael í uppnám. Til að bæta fyrir skaðann kallaði páfi fyrir sig leiðtoga gyðinga í Róm og sagði þar að tilraun nasista til að þurrka út gyðinga í Evrópu hefði verið „glæpur gegn guði“.
Hann kvaðst ekki hafa vitað um skoðanir Williamson og hefði fyrirskipað honum að endurskoða þær.
Williamson, sem á bloggsíðu sinni kallar sig „risaeðlu“, hefur svaraði því til að hann muni nú fara á ný yfir söguleg gögn um helförina og leiðrétta sig finni hann sönnunargögn þar að lútandi en það muni óhjákvæmilega taka tíma. Það er nú ljóst að sú rannsóknarvinna mun fara fram í öðru landi.
