Mannskætt námuslys í Kína
Björgunarmenn hlaupa niður í námurnar til að bjarga þeim verkamönnum sem hægt er. Reuters
Að minnsta kosti 73 námuverkamenn létust og 1133 voru fluttir á sjúkrahús eftir að gassprenging varð í kolanámu í norðurhluta Kína í nótt. Enn brennur í námunni þar sem tugir manna eru innilokaðir.
Kínverskar námur eru taldar með þeim hættulegustu í heimi því yfir 3.000 manns farast árlega við störf í þeim vegna eldsvoða, flóða og sprenginga. Sprengingin í nótt varð þegar 436 námuverkamenn voru í Tunlan kolanámunni í borginni Gujiano sem er í Shanxi héraði, ekki fjarri höfuðstaðnum Taiyuan.
Af þeim 113 sem fluttir voru á spítala eru 21 sem eru taldir í lífshættu, að sögn Xinhua fréttastofunnar í Kína. Í frétt hennar kom ekki fram hversu margir væru enn lokaðir inni í námunni en áður hafði komið fram að a.m.k. 65 manns væru enn neðanjarðar.
Ríkissjónvarpsstöðin CCTV sýndi myndir af björgunarmönnum á leið inn í lyftu sem flytja átti þá niður í námugöngin á meðan sjá mátti aðra koma út úr námunni berandi námumenn á börum í átt að sjúkrabílum sem biðu þeirra.
Nærri 100 björgunarmenn voru á staðnum en eldur sem enn logar í göngunum aftrar vinnu þeirra. Hinir særðu eru haldnir reyk- og kolefniseitrun, sem getur leitt til dauða.
Náman er í eigu Shanxi Coking Coal Group, sem er einn stærsti framleiðandi svokallaðra sindurkola í Kína sem notuð eru í stáliðnaði. Fyrirtækið er með 28 námur á sínum snærum. Engin slys hafa orðið í Tunlan námunni síðasta áratuginn en náman framleiðir 5 milljónir tonna af sindurkolum árlega.
Í fyrra var yfir 1.000 litlum námum lokað í Kína í því skyni að draga úr námuslysum. Engu að síður eru námuiðnaðurinn í landinu sá mannskæðasti í heimi. Um 3.200 manns létust í námuslysum í fyrra, sem er um 15% færri dauðsföll en árið á undan. Mikill munur er þó á öryggi í námunum. Stórar ríkisnámur hafa öryggisstaðla sem nálgast þá sem gerðir eru í þróuðum ríkjum á meðan minni námur hafa lítil sem engin öryggistiltök og þar er þjálfun verkamannanna einnig í lágmarki.
Opinberar tölur sýna að nærri 80 prósent þeirra 16 þúsund náma sem eru í Kína eru lítil, ólögleg fyrirtæki.
