Richard Williamson í lögreglufylgd á Heathrow flugvelli í Lundúnum. Reuters

Breskur biskup, Richard Williamson, sem hafði afneitað helförinni í sjónvarpsviðtali hefur beðist opinberlega afsökunar á orðum sínum, samkvæmt fréttum sem AP fréttastofunnar. Orð Williamson, þess efnis að hann efaðist um sannanir fyrir því að helförin hafi átt sér stað, ollu uppnámi.

Williamson sendi frá sér yfirlýsingu þar sem hann afsakaði orð sín. „Ef ég hefði vitað fyrirfram að orð í þá veru sem féllu hjá mér gætu sært eins mikið og þau hafa augljóslega gert, sérstaklega innan kirkjunnar og hjá aðstandendum fórnarlamba helfararinnar, þá hefði ég ekki látið þau falla. Ég iðrast þess að hafa látið þessi orð falla.“

Trúarhreyfingin þar sem Williamson er biskup, hafði áður sagt Williamson aðeins vera að tala fyrir sjálfan sig en ekki þau gildi sem hreyfingin stæði fyrir.

Orðin féllu í sjónvarpsviðtali 21. janúar sl. í Svíþjóð. Hann sagðist einnig ekki hafa séð neinar sannanir fyrir því að gasklefar hefðu verið notaðir til pyntinga í seinni heimstyrjöldinni af þýskum nasistum.

Vatíkanið hafði ekki sent frá sér sérstaka tilkynningu vegna orða Williamson, af því er haft er eftir talsmanni Vatíkansins Federico Lombardi. Vatíkanið hafði áður harmað orð Williamson.

Iris Rosenberg, talsmaður Yad Vashem Holocaust safnsins í Jerúsalem, sagði afsökunarbeiðni ekki segja mikið. Aðalatriðið væri að hann beðist velvirðingar á því að hafa farið á „svig við sannleikann“.

Péturstorgið við Vatíkanið. Ómar Óskarsson