Robert Mugabe, forseti Simbabve, gæðir sér á köku í tilefni afmælis síns. AP

Robert Mugabe, forseti Simbabve, hét því er hann hélt upp á áttatíu og fimm ára afmæli sitt á laugardag að halda áfram þeirri stefnu sinni að taka land af hvítum bændum og afhenda það eignalausum almenningi í landinu. Hann hét því þó einnig að virða samstarfssamning nýrrar ríkisstjórnar landsins. Þetta kemur fram á fréttavef Sky.

Upptaka fyrri stjórnar Mugabe á jörðum hvítra bænda hefur einangrað landið á alþjóðavettvangi og kunnáttuleysi þeirra sem fengu jarðirnar í hendur er talin ein meginástæða þess að efnahagur landsins hefur hrunið á síðasta áratug.  

Tvær vikur eru frá því mynduð var stjórn fyrri stjórnar og stjórnarandstöðu í landinu og í kjölfar þess  biðlaði Morgan Tsvangirai, forsætisráðherra hennar til alþjóðasamfélagsins, um aðstoð við að byggja efnahag landsins upp að nýju.