Tzipi Livni, utanríkisráðherra Ísraels, tók á móti Hillary Rodham Clinton, utanríkisráðherra Bandaríkjanna, við komu hennar til Ísraels í morgun. AP

Hillary Clinton, utanríkisráðherra Bandaríkjanna, hét því í dag að vinna með næstu ríkisstjórn Ísraels. Hún tók þó skýrt fram að það væri stefna Bandaríkjastjórnar að stefna að stofnun sjálfstæðs ríkis Palestínumanna en Benjamin Netanyahu, sem fer með umboð til stjórnarmyndunar í landinu, er andvígur fullu sjálfstæði ríkis Palestínumanna. Þetta kemur fram á fréttavef Ha’aretz. 

Clinton sem er nú í sinni fyrstu heimsókn til Ísraels sem utanríkisráðherra, sagði þetta áður en hún hélt til fundar við Netanyahu í dag. Netanyahu hefur verið harður gagnrýnandi friðarumleitana Bandaríkjanna í deilum Ísraela og Palestínumanna og er talið líklegt að stefna stjórnar Baracks Obama Bandaríkjaforseta verði honum enn síður að skapi en stefna stjórnar George W. Bush.

„Á ráðstefnunni lagði ég áherslu á að Obama forseti og ég værum staðráðin í að vinna að tveggja ríkja lausninni í deilunum á milli Ísraela og Palestínumanna,” sagði hún og vísaði þar til ráðstefnu um málefni Palestínumanna sem haldin var í Egyptalandi um síðustu helgi.