Bresk stjórnvöld gripu í dag til ráðstafana til að koma í veg fyrir að þarlendar sveitarstjórnir skerði þjónustu eða hækki útsvar til að mæta tapi vegna Icesave-reikninga Landsbankans. Talið er að breskar sveitarstjórnir hafi átt um 900 milljónir punda inni á slíkum reikningum þegar Landsbankinn féll.

John Healey, ráðherra sveitarstjórnamála gaf í dag út reglugerð um ársreikninga sveitarfélaga sem gerir þeim kleift að fresta uppgjöri vegna hugsanlegs Icesave-taps til fjárhagsársins 2010-2011.

Reutersfréttastofan hefur eftir Healey, að í kjölfar falls íslensku bankanna á síðasta ári hafi ríkisstjórnin gripið þegar til aðgerða til að tryggja, að engar sveitarstjórnir lentu í alvarlegum skammtímavandræðum.

Hann segir, að fé sveitarfélaganna sé ekki tapað en sé í hættu og samvkæmt venjulegum uppgjörsreglum þurfi sveitarfélögin að taka tillit til þess í uppgjörum sínum. Nýju reglurnar taka gildi 31. mars.

Samkvæmt tölum, sem breska ríkisstjórnin birti í dag, áttu 125 sveitarstjórnir samtals 923,2 milljónir punda á reikningum í íslenskum bönkum í lok síðasta árs. Breytingarnar á uppgjörsreglunum gefa þessum sveitarstjórnum svigrúm meðan reynt er að endurheimta féð, að sögn Healeys.