Herlögreglan færir grunaðan hryðjuverkamann til yfirheyrslu í Guantanamo Bay á Kúbu. MARC SEROTA

Sameinuðu þjóðirnar saka Breta um að hafa látið pyntingar viðgangast og skerða þannig grunndvallar mannréttindi fanga í bandarískum fangabúðum. Þetta kemur fram í nýrri, afar gagnrýninni skýrslu sem fordæmir Bretar fyrir að hafa reynt að fara í felur með ólöglegt athæfi í stríðinu gegn hryðjuverkum.

Hlutdeild Breta í fangaflutningum Bandaríkjamanna til staða þar sem allt benti til að þeir yrðu pyntaðir er gagnrýnd harðlega í skýrslunni. Þar eru yfirmenn bresku leyniþjónusturnar sakaðir um að hafa yfirheyrt fanga sem haldið var eingangruðum í Pakistan í „svokölluðum öryggishúsum þar sem þeir voru pyntaðir.“

Þá er því haldið fram að Bretar, ásamt fleiri þjóðum, hafi sent menn til Guantanamo Bay til að sjá um yfirheyrslur sem sé annað dæmi um það sem megi „með góðum rökum skilja sem óbeina þátttöku“ í pyntingum og slæmri meðfer. Bandaríkin hafi aðeins náð að flytja grunaða hryðjuverkemenn með þeim hætti sem þau gerðu milli landa með hjálp bandamanna sinna.

Skýrslan var kynnt fyrir allsherjarþingi Sameinuðu þjóðanna og líkleg til að auka enn á þrýsting sem mannréttindahópar hafa þegar sett á bresk stjórnvöld um að rannsaka hlut bresku leyniþjónustunnar í leynilegum fangaflutningum CIA. „Bann gegn pyntingum er algjör og ófrávíkjanleg meginregla í alþjóðalögum,“ segir í skýrslunni.

Þá er þar einnig lýst áhyggjum af þeirri þróun að notuð séu í auknum mæli ákvæði um ríkisleynd með vísan í þjóðaröryggi. Lönd eins og Bretland og Bandaríkin, Þýskaland, Ítalía, Pólland, Rúmenía og Makedónnía eru þannig sökuð um að hylja ólöglegan verknað gagnvart dómsyfirvöldum. Þetta sé gert í þeim tilgangi einum að „fría löndin fyrir gagnrýni, skömm og síðast en ekki síst - ábyrgð.“