Lögregla í Freetown höfuðborg Sierra Leone beitti táragasi og skaut viðvörunarskotum til að dreifa mannfjölda eftir að til átaka kom á milli stuðningsmanna tveggja stjórnarandstöðuflokka í borginni í dag. Spenna hefur aukist mjög  í borginni undanfarna daga og herma óstaðfestar fréttir að nauðgunarbylgja gangi nú yfir þar. Þetta kemur fram á fréttavef BBC. 

Átökin brutust út  á milli fylkinganna við höfuðstöðvar  stjórnarandsröðuflokksins Þjóðarflokks Sierra Leone. Segir lögregla marga mótmælendanna haf verið vopnaða byssustingjum.

Átök brutust einnig út í borginni á föstudag og var þá tveimur útvarpsstöðvum lokað þar sem þær voru sagðar hafa ýtt undir átök. 

Ofsinn sem einkennt hefur deilurnar í landinu að undanförnu þykir  minna óþægilega mikið á þá grimmd sem einkenndi borgarastyrjöldina í landinu. 

Átján mánuðir eru frá því kosningar fóru fram í landinu. Þóttu þær takast einstaklega vel en síðan hefur spenna aukist mikið og í síðustu viku varð að fresta aukakosningum á Pujehun svæðinu vegna ofbeldisverka.