Tamíl Tígrar standa heiðursvörð. Stórsókn gegn þeim hefur nánast knésett stjórnvöld í landinu fjárhagslega. Reuters

Sri Lanka mun bráðlega hefja viðræður við Alþjóðagjaldeyrissjóðinn um 1,9 milljarða dollara lán, að sögn embættismanna þar í landi. Ástæðan er ekki síst slæmt ástand í efnahagsmálum vegna kostnaðar við gríðarlega hernaðarsókn, sem ætlað er að brjóta á bak aftur Tamíl-Tígrana, uppreisnarmenn í norðurhluta landsins.

„Við munum hefja viðræður við sendinefnd AGS næsta mánudag, til þess að komast að samkomulagi um áætlun með sjóðnum,“ sagði Nandalal Weerasinghe, aðalhagfræðingur seðlabanka Sri Lanka, við fréttaritara AFP.

Stjórnvöld hafa undanfarið lagt 1,6 milljarða dollara í hernaðinn og halda því nú fram að þau séu nálægt því að þurrka Tamíl-Tígrana út. Hagfræðingar bæta því við að alþjóðakreppan og sú stefna stjórnvalda að viðhalda ríkisrekstri í mörgum geirum atvinnulífsins hafi aukið á vandann.

AGS hefur hingað til ekki tjáð sig um þessar viðræður, en búist er við því að sjóðurinn krefjist niðurskurðar í opinberum útgjöldum, hækkun stýrivaxta og gengisfellingar. Mahinda RAjapakse, forseti Sri Lanka, hefur sagt að hann muni fá lánið á sínum eigin skilmálum og heitið því að standa gegn þeim skilyrðum sem stjórn hans meti óásættanleg.

„Við munum ekki veðsetja eða selja föðurland okkar fyrir fjárhagsaðstoð,“ er haft eftir honum í dagblöðum þar í landi. „Við munum heldur ekki beygja okkur undir skilyrði eða breyta landi okkar í nýlendu.“

Þetta er í annað sinn sem Sri Lanka leitar á náðir AGS, eftir að hætt var við lán frá sjóðnum árið 2004. Þá dró ríkisstjórnin sig út úr viðræðum og sagði skilyrði sjóðsins óásættanleg.

„Í bráðabirgðaviðræðum samþykkti AGS að krefjast ekki einkavæðingar, en þeir munu hanna aðstoð sína þannig að hún styðji við efnahagsáætlun stjórnvalda,“ sagði seðlabankastjórinn. Búist er við því að AGS taki ákvörðun um lánveitingu til Sri Lanka um miðjan apríl.