Lögregla í Svíþjóð tók í gær á móti þremur kærum um nauðganir um borð á ferjum sem sigla á milli Stokkhólms og  Mariehamn á Álandseyjum. Í einu tilfellinu kærði kona sex karlmenn fyrir nauðgun og hafa þrír þeirra verið yfirheyrðir en þrír verða yfirheyrðir í kvöld.

Mennirnir eru grunaðir um að hafa nauðgað konu aðfaranótt laugardags um borð í ferjunni Birka Paradise. Beið lögreglan þegar ferjan kom í höfn á Mariehamn á laugardag. 

Síðar sama dag tók lögregla á móti ferjunni Silja Galaxy þegar hún kom til Stokkhólms en kona, sem var um borð, hafði hringt í lögregluna og kært nauðgun. Ekki hafa fengist nánari upplýsingar um það mál.

Á laugardagskvöld tók Stokkhólmslögreglan síðan á móti ferjunni Viking Cindarella, þegar hún kom þangað frá Álandseyjum eftir að kona á fimmtugsaldri kærði tvo 15 ára gamla drengi fyrir nauðgun. Lögreglan segir, að eftir að hafa rætt við konuna og drengina virðist sem þeir hafi átt samræði við konuna með hennar samþykki en að öll hafi þau verið verulega ölvuð.