Ehud Barak og Benjamin Netanyahu. Reuters

Benjamin Netanyahu, leiðtogi Likud-flokksins í Ísrael, og Ehud Barak, leiðtogi Verkamannaflokksins, hafa náð samkomulagi um stjórnarsamstarf. Það er þó háð samþykki stofnana Verkamannaflokksins. Boðað hefur verið til fundar í miðstjórn flokksins í dag til að fjalla um málið og er ljóst að skoðanir verða þar afar skiptar.

Verkamannaflokkurinn mun fá fimm ráðherraembætti í stjórn Netanyahus samkvæmt samkomulaginu og verður Barak áfram varnarmálaráðherra eins og hann hefur verið í stjórn Kadima-flokksins og Verkamannaflokksins, sem verið hefur við völd undanfarin ár.

Netanyahu hefur áður náð samkomulagi við tvo flokka yst á hægri væng ísraelskra stjórnmála um myndun samsteypustjórnar.

Samkomulag Likud og Verkamannaflokksins felur í sér, að sögn ísraelska útvarpsins, að haldið verður áfram friðarumleitunum við Palestínumenn og fyrri samningar verða virtir. Þá mun stjórnin einnig sporna gegn óskipulaðri landtöku Ísraelsmanna á Vesturbakkanum. 

Verkamannaflokkurinn, sem áður var helsta aflið í ísraelskum stjórnmálum, beið afhroð í þingkosningum í febrúar. Líklegt er að flokksmenn muni ekki allir taka því fagnandi, að flokkurinn fari í stjórnarsamstarf við Likud-flokkinn.

Flokkarnir fjórir, sem nú hafa náð samkomulagi um ríkisstjórn, ráða samtals 66 þingsætum á ísraelska þinginu af 120. Likudflokkurinn hefur 27 þingsæti, Yisrael Beitenu, sem er flokkur öfgasinnaðra þjóðernissinna, hefur 15 þingsæti, Shas-flokkurinn, sem er flokkur strangtrúaðra gyðinga, 11 þingsæti og Verkamannaflokkurinn 13 þingsæti. 

Að minnsta kosti 7 þingmenn Verkamannaflokksins eru andvígir stjórnarsamstarfi við Likud-flokkinn og þeir lýstu andstöðu við að flokkurinn tæki upp viðræður við Netanyahu.  Barak sagði hins vegar í síðustu viku, að það samræmdist hagsmunum Ísraelsmanna og kjósenda flokksins aðtaka þátt í ríkisstjórn. 

Meðal andstæðinga stjórnarsamstarfsins eru Eitan Cabel, framkvæmdastjóri Verkamannaflokksins, og Amir Peretz, fyrrum flokksleiðtogi. Hafa þeir sagt, að ríkisstjórnin gæti ekki reitt sig á stuðning þeirra á ísraelska þinginu.