Gordon Brown forsætisráðherra Bretlands Reuters

Gordon Brown, forsætisráðherra Bretlands, gerði í dag lítið úr deilum yfirvalda í Bandaríkjunum annars vegar og Evrópu hins vegar, um það hvernig best sé að bregðast við efnahagskreppunni. Brown, sem staddur er í New York sagði mun meiri samstöðu en ágreining vera á milli þessara aðila um málið. Þetta kemur fram á fréttavef BBC.

Þá sagði hann leiðtoga beggja vegna Atlantshafsins sammála um að þörf sé á að fara yfir þær aðgerðir sem þegar hafa verið gripið til og ræða hvað gera eigi næst. 

Brown sagði leiðtogana staðráðna í að gera hvað sem til þurfi til að hagvöxtur komist á að nýju og kvaðst binda miklar vonir við væntanlegan leiðtogafund G20 ríkjanna í London. 

„Ég vona að á G20 fundinum samþykkjum við ekki bara þá leið sem við ætlum að fara fram á við, með heimsviðskiptasamkomulagi, heldur stuðlum við einnig að aukinni verslun í heimi þar sem verslun er nú að dragast saman,” sagði hann. 

Brown sagði bæði Bandaríkjamenn, sem vilja leggja áherslu á að koma peningaflæðinu í gang, og Evrópubúa, sem vilji skýra og styrkja reglur, hafa mikið til síns máls.

Þá sagði hann að honum hafi ekki þótt erfitt til þessa að sannfæra leiðtoga um mikilvægi þess að setja alþjóðlegar reglur um viðskiptahætti. Nefndi hann umræður um skattaskjól og mikilvægi þess að veittar verði upplýsingar um fjármuni sem þangað hafa verið fluttir sem dæmi um slíkan árangur.

„Ákveðinn árangur hefur náðst og meiri árangur á eftir að nást og ég er viss um að við höfum alþjóðlegt ákvörðunarferli sem getur skilað árangri,” sagði hann.