Frá Kaupmannahöfn. mbl.is/Brynjar Gauti

Hæstiréttur Danmerkur dæmdi í dag sex Dani seka um brot á hryðjuverkalögum með því að selja stuttermaboli til styrktar hópum sem skilgreindir eru sem hryðjuverkahópar. Staðfesti hæstiréttur með þessu dóm áfrýjunardómstól Kaupmannahafnar frá því september en stytti dóm yfir þremur.

Áfrýjunardómstóllinn dæmdi tvo í sex mánaða fangelsi en hina fjóra í skilorðsbundið tveggja til fjögurra mánaða fangelsi fyrir söluna á bolunum en á þeim var að finna merki  Frelsishreyfingar Palestínu (PFLP) og kólumbísku skæruliðasamtakanna FARC. Fólkið ætlar að fara með málið til Mannréttindadómstóls Evrópu.

Samtökin eru bæði á hryðjuverkalista Evrópusambandsins og Bandaríkjanna.

Árið 2007 voru hins vegar allir þeir sem dæmdir voru í dag sýknaðir í héraðsdómi en niðurstaða dómarans þá var sú að samtökin væru ekki hryðjuverkasamtök.

 Voru tveir mannanna dæmdir í Hæstarétti í sex mánaða skilorðsbundið fangelsi, en þeir eru taldir vera höfuðpaurarnir í málinu. Dómar yfir þrem héldust óbreyttir, tveggja til fjögurra mánaða skilorðsbundið fangelsi en dómur eins var styttur úr fjögurra mánaða skilorðsbundnu fangelsi í tvo mánuði skilorðsbundið.

Flestir þeirra sem eru ákærðir í málinu tengjast fyrirtæki sem heitir Fighters and Lovers. Fyrirtækið seldi bolina á netinu þar til lögregla lokaði fyrirtækinu. Áfrýjunardómstólinn gerði söluhagnað af bolunum upptækan, alls 24 þúsund danskar krónur. Bolirnir voru seldir á 170 danskar krónur hver og runnu 37 krónur af söluandvirðinu til samtakanna.

Ulrik Kohl, sem var dæmdur í sex mánaða skilorðsbundið fangelsi, er afar ósáttur við dóminn og segir í samtali við Politiken að hann sé fáránlegur. Stjórnmálamenn setji lög sem gangi gegn lýðræðisréttindum íbúa.

Katrine Willumsen, sem fékk tveggja mánaða dóm, er einnig mjög ósátt og segir að stjórnmálamönnum væri nær að viðhafa samræður í stað þess að berja fólk í höfuðið með hryðjuverkalögum. Það sé ekki rétta leiðin til þess að leysa vandann.