Benedikt páfi blessar lýðinn á Péturstorgi Vatikansins OSSERVATORE ROMANO

Meira en helmingur Ítala er „algjörlega ósammála“ yfirlýsingum Benedikts XVI páfa um smokkanotkun, sem hann lét falla í heimsókn sinni til HIV-hrjáðra svæða í Afríku.

Ummælin vöktu hörð viðbrögð um allan heim og í kjölfarið gerið dagblaðið La Republica skoðanakönnun  sem leiddi í ljós að aðeins einn af hverjum fimm Ítölum styðja skoðanir páfans um að smokkanotkun geti gert illt verra við útbreiðslu HIV.

En þrátt fyrir að 52,3% þjóðarinnar segist vera „algjörlega ósammála“ afstöu páfans, segjast samt 54,9% enn hafa traust á Benedikt, sem er svipað hlutfall og mælst hefur undanfarna 12 mánuði. Mannúðarsamtök og nokkrar ríkisstjórnir gagnrýndu páfann fyrir ummæli sín og voru þau sögð óábyrg. Sameinuðu þjóðirnar svöruðu fyrir sína parta að smokkar væru nauðsynleg og áhrifarík vörn til að koma í veg fyrir sjúkdóminn.

Í könnun La Republica voru fleiri spurningar sem eru viðkvæmar Páfagarði lagðar fyrir almenning og leiddi hún m.a. í ljós að þrír af hverjum fimm segjast vera hlynntir jöfnum réttindum samkynhneigðra og gagnkynhneigðra para, 80% segjast samþykk tæknifrjóvgun og álíka margir segjast fylgjandi lögum sem leyfðu fólki að óska eftir líknardauða.

Þrátt fyrir að Vatikanið hafi enn gríðarlegt áhrifavald í hinni kaþólsku Ítalíu þá er tíðni fóstureyðinga þar í landi ein sú hæsta í Evrópu, en á hinn bóginn eru hjónaskilnaðir ennþá fátíðir.