Eftirlaunasamningur Freds Goodwins hljóðar upp á 693 þúsund pund Reuters

Skemmdarverk voru unnin á heimili fyrrum forstjóra Royal Bank of Scotland, Fred Goodwin, í nótt. Goodwin hefur verið harðlega gagnrýndur fyrir eftirlaunasamning sem gerður var við hann í október í fyrra. Samkvæmt samningnum lét Goodwin af störfum gegn því að komast þegar í stað á eftirlaun sem nema 693.000 punda á ári, eða sem svarar 116 milljónum króna. 

Goodwin er fimmtugur og áætlað er að eftirlaunaréttindi hans nemi alls 16 milljónum punda, sem svarar 2,7 milljörðum króna. Með samningnum tvöfölduðust eftirlaunaréttindin.

Gluggar á heimili Goodwin í Edinborg í Skotlandi og bifreið hans, Mercedes S600, voru brotnir, en unnið er að rannsókn málsins og vitna leitað, að sögn lögreglunnar í borginni.

Starfslokasamningurinn hefur vakið mikla reiði meðal almennings, enda nam tap  RBS rúmum 24 milljörðum punda á síðasta ári, en það er mesta tap fyrirtækis í sögu Bretlands. Bresk stjórnvöld hafa lagt 20 milljarða punda í rekstur bankans og er eignarhlutur ríkisins í bankanum 70%.

Gordon Brown forsætisráðherra og Alistair Darling fjármálaráðherra hvöttu bankastjórann fyrrverandi til að afsala sér hluta eftirlaunanna en Goodwin neitaði því.

Nágranni Goodwin, sem ekki vill láta nafns síns getið, segist vera undrandi á því að þetta hafi ekki gerst fyrr, það er að einhverjir hafi látið reiði sína bitna á eignum bankastjórans fyrrverandi.

Heimili Fred Goowin í Edinborg Reuters