Anders Fogh Rasmussen forsætisráðherra Danmerkur. AP

Nokkur andstaða virðist vera við Anders Fogh Rasmussen, forsætisráðherra Danmerkur,  í embætti framkvæmdastjóra Atlantshafsbandalagsins NATOí nágrannaríkjum Danmerkur. Greint hefur verið frá andstöðu pólskra yfirvalda við skipan hans í embættið og nokkuð hefur farið fyrir neikvæðri fjölmiðlaumfjöllun um hann í fjölmiðlum í Noregi að undanförnu. Þetta kemur fram á fréttavef Jyllands-Posten.

Þannig er Fogh m.a. kallaður kjölturakki Bush fyrrum Bandaríkjaforseta í forystugrein Aftenposten, stærsta dagblaðs Noregs. Einng eru þar settar fram spurningar um samskiptahæfni hans og þar með hæfni hans til að miðla málum, byggja upp traust og stuðla að samvinnu.

„Er virkilega ekki til heilsteyptari frambjóðandi í öllum aðildarríkjum NATO, segir Harald Stanghelle í greininni sem ber nafnið  „Blekkingameistari til NATO”.

Stanghelle segir dómgreindarleysi Fogh hafa komið hvað skýrast fram í eindregnum stuðningi hans við innrásina í Írak og yfirlýsingum hans um gereyðingarvopnaeign Íraka. Segir hann framkomu Fogh í málinu hafa sannað að hann sé leiðtogi sem veigri sér ekki við að bera lygar á borð fyrir almenning í málum sem varði stríð og frið.

Einnig segir hann framkomu Fogh í Múhameðsteikningamálinu hafa sýnt skort hans á færni til að takast á við viðkvæm deilumál. „Meðhöndlum Fogh Rasmussens í Múhameðsmálinu ber ekki vot um hæfni til málamiðlana á alþjóðlegum vettvangi. Þegar hann neitaði að hitta sendiherra frá nokkrum múslímalöndum sýndi hann pólitískan einstrengingshátt sem ekki lofar góðu. Það að hann neyddist síðan til að endurskoða þá afstöðu sína undirstrikar þetta,” segir m.a. í greininni.

Mótmælendur í Pakistan brenna dúkku sem sýnirAnders Fogh Rasmussen, forsætisráðherra Danmerkur. AP