Morgan Tsvangirai, forsætisráðherra Simbabve. Reuters

Morgan Tsvangirai, forsætisráðherra Simbabve, hefur lýst því yfir að þeir  sem leggi undir sig landareignir hvítra bænda í landinu verði handteknir. Er yfirlýsing hans túlkuð sem viðvörun til Roberts Mugabe, forseta landsins, og stuðningsmanna hans. Þetta kemur fram á fréttavef BBC. 

Tsvangirai hóf stjórnarsamstarf við Mugabe í febrúar og skömmu síðar hófu stuðningsmenn Mugabe að taka land af hvítum bændum og afhenda það almenningi.Túlka fréttaskýrendur það sem ögrun við Tsvangirai og í dag lýsti hann því  yfir að eignaupptaka lands sé í raun þjófnaður. 

Mugabe lýsti því nýlega yfir að stefnt sé að áframhaldandi eignaupptöku lands en slík eignaupptaka á síðasta áratug er talin ein helsta orsök efnahagshrunsins í Simbabve þar sem mikil þekking og verkkunnátta í landbúnaði hvarf með hvítum bændum sem hraktir voru af jörðum sínum. 

„Ríkisstjórnin veit af flestum þeim truflunum sem orðið hafa í landbúnaðarframleiðslu að undanförnu, og réttlættar eru með svokölluðum eignaréttarumbótum og lítur á þær sem þjófnað,” sagði Tsvangirai á fundi með stjórnarerindrekum og athafnamönnum í dag.

„Þeir sem halda áfram að taka þátt í slíkum aðgerðum verða handteknir og leiddir fyrir rétt. Ég hef falið ráðherra innanríkismála að brugðist verði við öllum glæpum og að hinir seku verði handteknir og leiddir fyrir rétt.” 

Tveir ráðherrar innanríkismála eru í stjórn Simbabve þar sem ekki náðist samkomulag um að á milli flokka Tsvangirai og Mugabe hvor flokkurinn fengi það embætti og það með yfirstjórn lögreglumála í landinu.