Karlmaður í Kólumbíu hefur verið ákærður fyrir að hafa beitt dóttur sína kynferðislegu ofbeldi frá unga aldri og eignast með henni átta börn. Málið hefur vakið mikinn óhug í landinu.

Maðurinn, sem heitir Arcebio Alvarez og er 58 ára, sagði fyrir rétti að hann væri saklaus þar sem konan væri ekki líffræðileg dóttir hans. Maðurinn er í gæsluvarðhaldi en börnin, þrír drengir og fimm stúlkur á aldrinum 1 til 19 ára,  voru sett undir vernd ríkisins. Maðurinn var fluttur í fangelsi í fylgd hermanna sem héldu reiðu fólki í skefjum.

Konan, Alba Nidia Alvarez 35 ára, sagði lögreglu að Arcebio hefði misnotað hana frá því hún var undir 10 ára aldri. Sagði konan, að prestur í heimabæ hennar, Mariquita, hefði hvatt hana til að leita til yfirvalda.

Móðir Alba Nidia lést þegar stúlkan var 5 ára. Alba segist vera dóttir Arcebio en hann sagði, þegar hann kom fyrir rétt í gær, að hann hefði tekið hana að sér. „Við samþykktum að taka upp ástarsamband vegna þess að við elskuðum hvort annað," sagði hann.

Málið þykir minna á mál Austurríkismannsins Josefs Fritzls, sem nýlega var dæmdur í ævilanga vist á réttargeðdeild fyrir að halda dóttur sinni fanginni í 24 ár, eignast með henni sjö börn og verða einu þeirra að bana.