Bandarískir hermenn í Írak. Reuters

Bandarískur hermaður, Josep P. Mayo, mun mæta fyrir herrétt í Þýskalandi í dag sakaður um að hafa skotið til bana íraskan fanga sem var bæði bundinn á höndum og fyrir augum, úti fyrir Baghdad. 

Mayo hefur verið kærður fyrir morð, samsæri um að fremja morð og fyrir að hindra framgang réttvísinnar, samkvæmt tilkynningu frá Bandaríkjaher. Hann var einn sjö hermanna sem flæktur er í málið og einn þriggja sem réttað er yfir vegna tengrda morða.

Hinir tveir eru John E. Hatley, sem sakaður er um að hafa tekið þátt í aftöku á fjórum írsökum föngum í mars eða apríl 2007 og Michael P. Leahy, herlæknir, sem hefur lýst sig sekan um morð og var dæmdur í ævilangt fangelsi í febrúar.

Atvikin áttu sér stað á sama tíma og eru Mayo, Hatley og Leahy sakaðir um að hafa með samanteknum ráðum skotið fjóra íraska fanga í höfuðið og losað sig við líkin út í skurð í Baghdad. Samkvæmt reglum Bandaríkjahers er bannað að skaða óvinahermenn eftir að þeir hafa verið afvopnaðir og eru í haldi. Hermönnunum þremur hafði að sögn New York Times verið skipað af yfirmönnum sínum að sleppa írösku föngunum lausum vegna ónógra sannanna um að þeir hefðu tekið þátt í skæruliðaárás.