Mikið hefur verið um sprengjuhótanir, bílrán og íkveikjur í Belfast á Norður-Írlandi í nótt og í morgun. Hafa stjórnmálaleiðtogar á svæðinu tengt atburði næturinnar við morð á tveimur hermönnum og lögreglumanni fyrr í þessum mánuði. 

Nokkrum lögreglustöðvum á svæðinu var lokað vegna sprengjuhótana í morgun og hótel í nágrenni Stormont þinghússins var rýmt. Þá voru 350 leikskólabörn send heim eftir að grunsamlegur pakki fannst á leikskóla þeirra.

Stjórnmálaleiðtogar á svæðinu segja aðskilnaðarsinna greinilega vera að sýna vöðvana í kjölfar morðanna á her- og lögreglumönnunum.

„Þeir glæpsamlegu hryðjuverkamenn, sem bera ábyrgð á þessum sprengjuhótunum og bílránum eru ekki einu sinni fyrirlitningarinnar virði  og njóta ekki nokkurs stuðnings í samfélaginu,” segir Peter Robinson, fyrsti ráðherra Norður-Írlands. „Á síðustu vikum hefur Norður-Írland sent þessum morðingum skýr skilaboð. Við látum ekki draga okkur aftur inn í dauða og líkamsmeiðingar.”

Caral Ni Chuilin, talsmaður Sinn Fein, hefur einnig gagnrýnt árásirnar. „Mig langar til að biðja talsmenn þeirra sem standa á bak vð þetta að koma fram og útskýra hvernig slíkt færir okkur nær takmarki okkar um sameinað Írland.”

Morðin, sem áttu sér öll stað á tveimur sólarhringum, voru fyrstu morðin sem tengjast deilum sambands- og aðskilnaðarsinna á Norður-Írlandi frá því friðarsamkomulag var undirritað árið 1998.